Le chot.
Ala naut, sus la montanho, per dela las crincos de Sant Salvaire, i a un vielh oustal aclapat, arrouinat, mai
tat demoulit, d'uno part estable e bourdet, de l'autre demoro de pastre: aco s'apelo Belvese.
Era autris cops, un d'aquelis oustals de mestre que senhourejabo pla lenh sul campestre. Sas bousenos anavon a perdo de visto. Mes del temps de Moussu Larroupit, le mestre vielh, mort i a qualquis ans, tout s'ero desanat e casut a l'abandou. Ero un ome doulentas e sarro-diniès que nou se pot dire.. Digus poudio pas viure a soun entour; disionqu'aimabo se que l'argent e l'or, e que n'avio d'amagat qui sap quant e qui sap ount!
Dounc dins aquel estable de Belvese i avio un magre troupet d'un centenat de ouelhos e, dins la vielho demoro, Pascalou le pastre; un brav'home de pastre que s'adalissio en estudian les cambioments de tems sus serrous ventats de san-Salvaire, en menant peiche soun bestial.
Pascalou gardabo soun aujan ses aquel planeh pelat que penjo caps à Verdoulet, quan vejec arriva un moussu vestit de bourro que, din le "teuf-teuf" d'uno moto, s'i venguec atura davant li siu nas.
- Couneguets Pascalou? sas dits?
- Soum ieu, moussu, respoundec le pastre.
- Tenets... Moussu Larroupit filh vous mando asso, sa fasec l'ome bourrut en i boutan dins la ma qualcos fuelhos de papié blu. E se le mes que ve i avets pas pagat les cinq ans de rendo que i devets, vous fara vende el troupel. Ieu soun l'uchè cargat de vous ac fe sabe! Anem, brave amic, adissiats!
E aqui, nostre ome que virec sa machino, un pauc la fasec courre, i sautec cambarlous e s'en anec...
Le paure Pascalou virabo e revirabo po's digts soun papiè blu, semblabo pirol. Se pensabo qu'aquelo vidasso ta espinhudo, ta durasso, nou s'aprestabo pos a flouri per el. Misero de sort! El qu'abio uno pauro fenno e tres mainajous a fe veni, a fe manja ambe l'magre rebengut d'un troupel estequit e que, per recargo, la marrano avio persiegut tout l'an sense relambi; les anelhs malauts, le fems a un douana e la lano, nou'n parlem! Misero! E qu'avio patit touto son estsistensoe que venio de tira cinq ans de guerro terriplo dins la Coulounialo...
Le soulelh rentelat de decembre penjabo deves les acrins pireneans, la neit se sarrabo. Pascalou fiulec le gous e, sas ouelhos a l'en-darre, s'escaminec cap a caso. Ero soulet dins son oustal. Sa fenno e les mainages eron devalats a Fouich ount eron counvidats per la vesperado.
Pascaolu, dins el, maudissio aquel Larroupit que, sense cap de misericordio s'aprestavo per escana-le. Per cassa aquelos doulentos ideos, voulguec fe gran foc. La lenho nou mancavo pas, ero a pielocs darre l'oustal. Ajec leu carrejat uno grosso camo de casse amb'un brassat de ramadilhos e aqui le bel foc abrandat.
Pascalou, sietat devans soun foc soumiabo. Le gous rouncabo, apasimat per la douso calou e le pastre pensaba...
Le foc, asimat, pujabo naut, naut tant naut que besse semblabo atenhe les saumies.
Tout d'un cop, s'ausic dins la chumeneio coumo un loung fragoment, quicom que se sougatissio al rans del tet; un fiulet fasquec " chuou! chuo!... chuo!...". Le fregament debalhec e dins la flambo, un labassi de soujo, de peiros, coumo se le vieilh oustal se demoulissio, taloment que le foc ne fusquec gaire be amourtat e un gros chot, les alirous rumats, maitat mort redoulec al mieit de la cousino.. Pascalou, un poc apaurugat avio feit un saut en darre per arrapa le margue d'agreu, qu'ero sou bastou de pastre, mes le gous s'ero airissat e d'un cop de maichelo avio desalatat l'aucelas.
Le foc avio patit d'aquelo revoulumado e quant la pou passado, Pascalou se sarrec per adouba las soucos un poc esparicados, que vejec? Al mieit de las cendres demets les riplous e la soujo, uno poulido caisseto d'acie que la casudo avio duberto, e qu'ero coumoulo de dourous, de pistolos e de louis d'or. Le pastre n'ajec un bel patac al cor.
En s'en tournan de Fouich, la moulhe e les drolles trouberon Pasalou amb'un papiè raspat dins las mas, troubat demest le tresor. Aquel papiè avio apres al pastre qu'aquelo fourtuno ero estado amassado dempei cent ans per Larroupit paire e gran, en panant oueilhos, vedelhs, sesties de blat, mesuros de civado, bouichels de mounjos, sacats de patanos e canos de lenho als aujols de Pascalou qu'avion fenit per esse arrouinats.
Aquel cofre, le vielh sarrat de Larroupit l'avio amagat dins un trauc de la chumeneio...